.jpg "طلاب المدارس مابين نعم ولا واخرها حسين والانتهاء بالنتيجة الكبرى ؟")
أعلنت إشارات ضبط الوقت عن تقديم استفتاء السنة الرئاسية واتطلب من الطالب إنه يتوجه لجنته ويبص في ورقته وبعيدا عن إن المراقبين نفسهم قرروا ما يراقبوش في اللجان ويسيبوها سداح مداح ، إلا إن إدارة المدرسة برضه قررت تعمل الامتحان وكعادة الطالب المصري ما ذاكرش وفضل منفض لغاية ما جه ميعاد الامتحان وبقى محتار بين 3 اختيارات ...
" نعم ، لا ، حســـين "
طبعا فيه طالب هيقول "نعم" في الورقة وتسأله يقولك اصل بسكلتة الانتاج مش محتاجة مسامير تاني ولازم تمشي وعايزين الواد استقرار واخته نهضة للمستقبل ، وطالب تاني هيقول نعم عشان ربنا قال لنا اطيعوا الله ، والرسول والمدرس والمعلم وأي حد يقولنا الدين بيقول ايه !!!
وطالب تاني هيقول "لا" في الورقة ويقولك اصل السؤال غتيت وما قدامناش اختيار تاني ، ولازم نختار ونثبت إن السؤال أصلا غلط ونرفع شكوى ومش بعيد المدرس اللي حاطط السؤال يتشال أو على الأقل السؤال يتلغي !!! وقبل ما اقولكم على الطالب الفاشل المستبيع دايما اللي هيقول " حســين " خليني أقولكم إننا هندخل الكنترول ونشوف النتيجة هتكون بـ " نعم " عاملة ازاي وبـ " لا " عاملة ازاي ؟؟
أولا نتيجة " نعم " بتاعة الاستقرار والانتاج والنهضة وهنجيب مجموع والكلام الحلو ده بتقول إننا كده هنبقى شربنا السؤال كله ، وكمان حصّنا الإدارة بالمدير بمدرسينه وموجهينه وحتى بمصلين مسجد المدرسة ، وكمان وافقنا على اللجنة اللي حطت السؤال ، ولو حد اتكلم هيتقال له انت نزلت وقلت رأيك والطلاب كلهم قالوا رأيهم والرأي الصح هو اللي فاز واشرب النتيجة يا حبيبي !! ولو اعترضت يبقى أنت بتعترض على شرعية كل حاجة زيك زي الفلول والطعمية والبتنجان اللي بقت تهمة كل واحد ..
ثانيا نتيجة " لا " ودي بتاعة السؤال غتيت وهنثبت إن اللجنة كوسة وإنها مالهاش صلاحية تحط الامتحان ، وممكن نشيل حتى مدير الإدارة بسبب سؤال زي ده ، اقولهم لما تقولوا "لا" هتكون النتيجة إن المدير يقولك الامتحان لاغي ونجيب لجنة على مزاجنا تحط لك امتحان من جديد وهتكون بموافقتك لإنك رفضت اللجنة الأولانية ووقتها برضه يا جميل عليك إنك تختار من اللجنة الجديدة اللي هتعينها الإدارة ويتقال منتخبة من اعضاء اتحاد طلبة المدرسة ( لان اعضاء اتحاد طلبة المدرسة اصلا بيحددهم مدير الإدارة )
نسيب الكنترول بقى ونروح للطالب الفاشل اللي هيقول بعزم ما فيه " حســـين " !!
اللي هيقولوا حسين دول بقى لا واقعين تحت " نعم ، ولا " دول مع نفسهم كده ، طلاب لا عاجبهم يبقوا تبع اهو نجاوب ونعدي ولا عاجبهم يبقى مجرد قطع شطرنج لا دول عايزين يبقوا لوحدهم كده في اللجنة لكن برضه مش واقفين في وش بتوع "لا" المهم الطلاب دول عايزين يطربقوها على دماغ المراقب ، والمصحح ، واللي حاطط الامتحان ومدرسين المدرسة وحتى المدير ، لإنهم عارفين الحدوتة ومش عايزين يبقوا زي الثور المربوط في الساقية ومتغمي ، ويفضل طول حياته يعاني في قيود الساقية وماشي ويقول طب ما أروي الأرض وغيري يستفاد بيها ..
لا دول قرروا لا يكونوا الثور ولا يكونوا الساقية ومن ساعة ما العصابة اتشالت عن عينيهم وعرفوا حقوقهم وهم حالفين إنهم مش هيشتغلوا تاني بنفس الطريقة ولا يرضوا بدور الثور ولا دور الساقية وخير الأرض اللي شغالين فيها يبقى للكل , طيب دول قالوا كلمتهم من زمان على الامتحان ، وعلى اللي حاطه ، وعلى مدير المدرسة ولصاحب الساقية ونادوا بعزم ما فيهم يـا " حســــين "
المصدر لمشاركة الطالب / مجدي
